Kungiyar Malaman Musulunci ta Duniya ta yaba da kokarin dalibai masu goyon bayan Falasdinu
A cewar shafin Arabic 21, kungiyar malaman musulmi ta duniya ta yaba da yunkurin dalibai a jami'o'in Amurka da na duniya na goyon bayan Falasdinu.
A cikin wata sanarwa da ta fitar, wannan kungiya ta yi kira da a fadada wadannan yunkuri domin dakile kisan kiyashin da gwamnatin sahyoniya ta ke yi a zirin Gaza.
Wannan sanarwar ta yi kakkausar suka kan murkushe zanga-zangar jami'o'i da 'yan sanda suka yi a Amurka, Jamus da sauran kasashe tare da bayyana cewa wadannan ayyuka tamkar muna fuskantar mulkin kama-karya ne.
Kungiyar malaman musulmi ta kuma jaddada yin Allah wadai da kisan kiyashi da ake ci gaba da yi tare da neman kawo karshen yakin da ake yi a zirin Gaza da kuma kare al'ummar Palastinu a zirin Gaza da yammacin kogin Jordan kan sojojin mamaya na Isra'ila.
A ranar 18 ga watan Afrilu ne dalibai masu goyon bayan Falasdinu a jami'ar Columbia da ke Amurka suka fara zaman dirshan a harabar jami'ar don nuna adawa da yadda jami'ar ke ci gaba da saka hannun jari a kamfanonin da ke goyon bayan mamayar Falasdinu da kisan kiyashin da aka yi a zirin Gaza a yayin wadannan zanga-zangar .
Bayan haka, zanga-zangar goyon bayan daliban Falasdinu ta bazu zuwa wasu manyan jami'o'i a Amurka, kuma jami'o'i da kwalejoji da dama sun nemi 'yan sanda su yi maganin masu zanga-zangar.
A cewar jaridar Washington Post, adadin daliban da aka kama a cikin kwanaki 10 da suka gabata ya kai fiye da mutane 900.
